Monday, May 3, 2021

అటు మేమే ఇటు మేమే! అన్నీ మేమే! మేక తోకకు మేమే!

 మా తరంతో పాయె, అయిపాయె, సచ్చిపాయె 

మర్యాద, గౌరవం, ఆదరణ అనేవి ఇంగ్లీషులో రెస్పెక్ట్ అనే ఒక పదానికే అర్థాలు అయినా తెలుగువారిలో, మా తరం వారిలో, మాకన్నా ముందు తరం వారిలో దేని అర్థం దానిదే 

పెద్దవాళ్ళకు ఆ మూడు ఇస్తూ బతికిన వాళ్ళం, బతుకుతున్న వాళ్ళం, బతకగలిగే వాళ్ళం

పచ్చని చెట్టున్న చోటే చీడపురుగులున్నట్టే, మా తరంలోనూ చీడపురుగులున్నాయి - అయితే వాటి శాతం అయిదు పదికి మించదు. తొంభై శాతం పైన జనాభా ఆ పై మూడిటితో సహవాసం చేస్తూ, ఒక్కోసారి తలనొప్పి అనుకున్నా అది పెద్దవాళ్ళకు ఇబ్బంది కలిగించే కట్టుబాటు కాకూడదు కనక నిశ్శబ్దంగా భరిస్తూ వాళ్ళకు ఏ లోటూ రాకుండా చూసుకున్న, చూసుకోగలిగిన, బతికించుకోగలిగిన గొప్ప తరం మాది

వాళ్ళు చూపిన దారిలో, చెప్పిన మాటలో బతికినా కూడా మా జీవితాలకు లోటు ఏమీ కలగలా. సుఖంగానే ఉన్నాం. వెంపర్లాటలో బతికిన తరం కాదు మాది. ఉన్నదాంతో సుఖంగా బతికిన తరం మాది. ఉన్నదాన్లో అయినవాళ్ళను, పెద్దవాళ్ళను సుఖంగా ఉంచాలని ప్రయత్నం చేసిన, చేయగలిగిన గొప్ప తరం మాది.   

అలాటి గొప్ప తరాల్లో మాదే చివరిది నిస్సందేహంగా

అయితే ఇక్కడో గొప్ప తర్కవితర్కమైన చిత్రం ఉన్నది

ఏమిటదీ? 

మంచికి అంతంగా చెడుకి ఆరంభంగా మిగిలిపోయిన తరం ఏదన్నా ఉన్నదా అంటే అదీ మా తరమే 

పైతరానికి ఎలా అణకువగా ఉన్నామో మా తరవాతి తరానికి కూడా తల ఒగ్గి వాళ్ళకు కావల్సినవి అక్కరలేనివి కూడా ఇచ్చి, అలవాటు లేని మార్పు తెచ్చుకుని నెత్తి మీద పెట్టుకుని, పిల్లల విచ్చలివిడితనాన్ని విస్మరించి, ఎందుకురా తుమ్మావు అనగానే ఆత్మహత్య చేసుకుంటే ఏడ్చి, ఆడపిల్లలని చిన్నచితకా పెద్దాముసలి అని లేకుండా బలాత్కారాలు చేస్తుంటే, ప్రాణాలు తీస్తుంటే గుడ్డివాళ్ళలా తలలు తిప్పి మాకు పట్టనట్టు ప్రవర్తించేసి, వీలుంటే ఒకటో రెండో వ్యాసాలు రాసేసి చేతులు దులుపుకునేసి (అందులో ఈ పోష్టు కూడా ఒకటి అనుకోవచ్చు మరేమీ ఫరవాలా), మనదాకా రాలేదుగా సమాజం ఎట్లా పోతే అందులోని వాళ్ళు ఎట్లా చస్తే అన్న నిర్లిప్త భావం పెంచేసుకుని, పదిశాతమో అంతకన్నా తక్కువగానో ఉన్న, ఉండాల్సిన దుర్మార్గపు దారిని 8 లేన్ హైవె చేసి వదిలేసి ఏదన్నా చేసుకోండి మాకెందుకు అన్న ప్రవర్తనకు బీజం వేసిన విషపురుగుల తరమూ మాదే! 

ఇంత గొప్ప తరం నభూతో నభవిష్యతి 

ప్రపంచం నాశనమైపోటానికి కారణ భూతులం మేమే! 

అంత గొప్పవాళ్ళం మేమే!   

అటు మేమే ఇటు మేమే! 

అన్నీ మేమే! 

మేక తోకకు మేమే!

No comments:

Post a Comment