Thursday, January 12, 2017

టీం - గౌతమిపుత్ర శాతకర్ణి

ఉన్న తెలుగుని కాపాడుకునే పరిస్థితికి తొలిమెట్టు - దరిద్రుల చేతుల్లో పడి పాతాళానికెళ్ళిపోయిన పాత చరిత్రను నిర్దయాత్మకంగా, నిర్దాక్షిణ్యంగా ఉద్ధరించెయ్యటమే! దానికోసం అడ్డదారులు తొక్కేసినా ఫరవాలా. ఎవరినీ పట్టించుకోవక్కరలా. ప్రపంచాన్ని అసలే. వ్యతిరేకించేవాళ్లని అసలే.

చరిత్ర అంటే స్వచ్ఛమైన నిజాలు అనే భ్రమలో పడిపోయిన మన పండితవర్గాలు ( Linguists / Historians / Elite Who? ) చేయాల్సిన ద్రోహం చాలానే చేసినాయ్. దేశద్రోహులకన్నా హీనమైన జాతి అది. విశ్వనాథ మీద, కోట వెంకటాచలం మీద, మన భాషను ఎంతో ఎత్తులో నిలపాలని ప్రయత్నించిన ఇంకా ఎంతో మంది మీద పేడకళ్ళెలు చల్లుకుంటూ మనల్ని మనమే తక్కువ చేసుకుని గుడ్డలూడదీసుకుని నగ్నంగా తిరుగుతున్న పండిత జాతి అది.

ఇంట్లో నలుగురు పిల్లలు ఉండగా బయటినుంచొచ్చిన పిల్లవాడి మీద ప్రేమ చూపిస్తావా అని చిన్న ప్రశ్న వేసుకొవాలె.

ఇంట్లో ఉన్న సొంత పిల్లల మీద ప్రేమ చూపించేదానికి, సొంత కుటుంబానికి ఇచ్చే ఆవశ్యకాన్ని, మన చరిత్రను మనమే ఎత్తుగా చూపిచుకోవటానికి తేడా లేదు. ఇక్కడ ఇల్లు మన రాష్ట్రం అవ్వాలె, భాష మన పిల్లలవ్వాలె. ఇతర భాషల్ని పక్కనబెట్టెయ్యాలె. ఇతరాల గురించి ఆలోచించాలంటే ముందు మనం ఆరోగ్యంగా బాగుండలె కదా! ఆ ఆరోగ్యం కోసం కసరత్తు చేసో, అవసరమున్నచోట స్టెరాయిడ్స్ ఎక్కించో బలిష్ఠంగా నిలపాలె. అది చూసి అచ్చెరువైపోయిన మాసు జనాల్లో ఒక కదలిక రావాలె.

ఆ పని చెయ్యడానికి ఒకప్పుడు సాహిత్యం ఉండేది. స్వార్థం కోసం, అవతలివాణ్ణి, సాటివాణ్ణి అణగదొక్కి తను పైకి రావాలి అనే నీచమైన తెలుగు జాతి జన్యువుల్లో స్థిరపడిపోయిన అలవాట్ల సహాయంతో ఆ పని చేసినవాళ్ళను గత వందేళ్ళలో వాళ్ళను, వాళ్ళ సాహిత్యాన్ని తుంగలో తొక్కారు. తొక్కితే ఫరవాలా, వేరేవాడు చెప్పినవి నెత్తిన బెట్టుకొన్నారు. సిగ్గుచేటు విషయం.

ఆ సాహిత్య మాధ్యమాన్ని, ఆ స్థానాన్ని సినిమా తీసుకొన్నది నేడు. దాని చేతులు పెద్దవి. కబంధుడి హస్తాల వంటివి. సరిగా ఎత్తు చేసి చూపగలిగితే పైననుకున్న కదలిక రావటం ఖాయం. కదలిక కాకపోయిన పరిచితి రావటం ఖాయం.

ఎట్లా తీసుకున్నా చరిత్రలో పాతిక శాతమే నిజమని మిగిలిన ముప్పాతిక శాతం ఆ చరిత్ర రాసినవాడి అభిప్రాయాలేనని చాలామందికి తెలిసిన విషయమే. 2000 సంవత్సరాల క్రితం తెలుగు లేదనే అబద్ధమైన చెత్త చారిత్రక నిజాన్ని నమ్మడం కన్నా దానికన్నా ఎన్నో వేల సంవత్సరాల ముందు నుంచి ఉన్నదన్న నిజమైన చారిత్రక నిజాన్ని నమ్మడం, ఆ నిజాన్ని ఎవరన్నా చెపితే వాళ్ళను ఆకాశానికి ఎత్తి మన నెత్తి మీద పెట్టుకోవటం తక్షణ కర్తవ్యం.

ఆ పైన చెప్పిన నీచమైన జన్యువులను అణగదొక్కుకుంటూ, చరిత్రను తిరగరాసేసుకుంటూ, తెలుగును - ఆ దేశ అఖండ భారత చక్రవర్తులను హిమాలయమంత ఎత్తున నిలిపి, ఆ పని ఒక తెలుగువాడు చక్కగా చేయగలడని చేసి చూపించిన టీం గౌతమిపుత్ర శాతకర్ణికి సాష్టాంగ నమస్కారాలు.

Be a dictator in upbringing your language, your history. And Satakarni team did just that. That awareness, that manufacture of proudness and injecting into mass was efficiently done. Thank you. Satakarni is a telugite and will remain one. If some one else wants to claim him as their own, they have no chance, we already did that and that is HISTORY for future generations. Get it ? If you did not get it, get the heck out of here!

Thank you Satakarni. Thank you balakrishna. Thanks to every one on that cast and helpers.

15 bucks is nothing. I will watch it 100 times and help with money if you gonna get me another telugu story like this Krishhhh......

Wednesday, January 11, 2017

వీళ్ళ పేర్లన్నీ వింతగా ఉంటాయండి

వీళ్ళ పేర్లన్నీ వింతగా ఉంటాయండి

ఎవరి పేర్లండి ?

రాయలసీమ వాళ్ళవి

ఏం ఎందుకలాగన్నారు ?

పుల్లారెడ్డి, ఆ రెడ్డి, ఈ రెడ్డి అని అదేదో గమ్మతు పేర్లుంటాయ్. ఆ పేర్లకు అర్థమేమిటో ఇంతమటుకు ఎవరికీ తెలీదు

మీకు తెలియదని వేరేవారికి తెలియదని ఎందుకనుకుంటున్నారు ?

అయితే మీకు తెలుసా సార్ ?



చెప్పండి అయితే

పుల్లా రెడ్డి - ఈ పేరు "ఫుల్ల" నుంచి వచ్చింది. ఈ ఫుల్ల అనేది సంస్కృత శబ్దం. ప్రఫుల్ల, ఉత్ఫుల్ల అని వినినావా ఎప్పుడన్నా?

వినలేదు కానీ ప్రఫుల్ అని బెంగాలి స్నేహితుడుండేవాడు సార్ నాకు

మరికనేం ?

మరికనేం అని వదిలెస్తే ఎట్ల సార్....చెప్పండి..

ఆ ఫుల్ల వికసించి మన వారి చేత వికృతిగా పుల్ల గా మారి నామధేయానికి ఎక్కి పుల్లారెడ్డి అయ్యింది

ఓ! అసలు ఫుల్ల అంటే ఏంది సార్ ?

ఫుల్ల అంటే వికసించినది అని - నిజం వేరుగా ఉండవచ్చు కానీ పూర్తిగా జ్ఞానసంపన్నుడవుతాడని ఆనాటి మన దేశపెద్దలు గ్రామ్యంగా పెట్టుకున్న పేరు, ఆ తర్వాత దాని సంగతి తెలియక అనువంశికంగా పెట్టుకున్న పేరు.

మీరు రాయలసీమ ఎప్పుడైనా వెళ్ళినారా ?

ఎందుకు అలా అడిగినారు?

మీకు ఈ పేర్ల సంగతి ఎట్లా తెలుసునని

పేర్ల కథా కమామీషు తెలియటానికి రాయలసీమ వెళ్ళనక్కరలేదండి, చదువుకుంటుంటే జ్ఞానదీపం మన చీకటిని కాస్త కాస్తగా తొలగిస్తుంది. అంతే

సంతోషం సార్. ఇంకెప్పుడు ఆ పేర్లని చిన్నపుచ్చి మాట్లాడను సార్!

గౌతమిపుత్ర శాతకర్ణి పేరు మీద ఒక చిత్రం విడుదల కానున్న సందర్భంగా!

స్వాగతం శాతకర్ణీ
తెలుగుతేజపు శాతకర్ణి

సినిమాకీ స్క్రీనుకీ
నడుమగల సరిహద్దులు
చెరిగిపోయెను ఈనాడు
చిత్రసీమల ఈనాడు

శబ్దాన్ని నిశ్శబ్దంతో
ధ్వంసం చెయ్యగల
శక్తివంతమైన  నాయకుడు
చలనచిత్ర శత కర్ణుడు

పరవశత్వం పెరిగి
నవనాయకత్వం పెరిగి
యువత్వం పెరిగి
వృద్ధత్వం వెనుకంజ

చరిత్ర తకధిణతోమని
చిందు వేయబోతున్న ఈ రోజు
చిత్రసీమల సర్వత్రా
సాటిలేని చిత్రం ఇది ఏనాడు

మా గౌతమిపుత్ర శాతకర్ణుని
మా శాతకర్ణిని చూడటమంటే
పటుత్వం ఉరకలు వేయదా ?
జడత్వం హడలెత్తిపోదా?

నాలోపల ఆ చిత్రం
ఊగించే ఉద్వేగం
పొంగించే ఉద్రేకం
రగిలించే ఆవేశం

నా లోపల కేయూరం
చేసె నటరాజ నర్తనం
శూలం వలె పెనుగాలం వాలె
నలిపేసే గౌతమిపుత్రుని చిత్రం

కరిభిత్ గిరిభిత్ కరిగిరిభిత్
శాతకర్ణుని వీరత్వం
కరి కరి భిత్
గిరి గిరి భిత్ బీభత్సం

ఉప్పొంగు ఉద్రేకశక్తీ
ఉరకల ఉత్సాహశక్తీ
అవిరళ దేశభక్తీ
శాతకర్ణుని రణశక్తీ

విడుదల కాబోవు అణుశక్తీ
చరిత్ర చాటే తెలుగుశక్తీ
నీకు సుస్వాగతం
గౌతమిపుత్ర శాతకర్ణీ !

-- నేనమితంగా అభిమానించే గౌతమిపుత్ర శాతకర్ణి పేరు మీద ఒక చిత్రం విడుదల కానున్న సందర్భంగా!



Saturday, January 7, 2017

ఉప్మారవ్వా రావమ్మా ...

ఉప్మారవ్వా రావమ్మా
నా ఆకలి తీర్చమ్మా
ఒక్కసారి నన్నూ
ఓదార్చీ పోవమ్మా
ఉప్మారవ్వా ||

మధురమైన జీడిపప్పు
మైమరచి వేస్తేను
నోటిలోని స్వాద ముకుళము
మాయమౌతాదంటా
ఉప్మారవ్వా ||

గుమ్మైన ఉలిపాయ పచిమిరప
మైమరచి వేస్తేను
నోటిలోన నాకసొరగము
ప్రత్యక్షమౌతాదంటా
ఉప్మారవ్వా ||

రంజైన రామ్ములగ
మైమరచి వేస్తేను
నోటిలోన వైకుంఠమే
పవ్వళించునంటా
ఉప్మారవ్వా ||

ఘుమఘుమల పోపులే
మైమరచి వేస్తేను
నోటిలోన కైలాసమే
నాట్యమాడునంటా
ఉప్మారవ్వా ||

యెందరెందరో తిన్నారూ
యేమేమో అన్నారూ
సుతీమెత్తానైన నీకూ
బంగారు పతకాలూ బహుమానమిచ్చారూ
ఉప్మారవ్వా ||

ఉప్మారవ్వా రావమ్మా
నా ఆకలి తీర్చమ్మా
ఒక్కసారి నన్నూ ఓదార్చీ పోవమ్మా
ఉప్మారవ్వా ||

-- Sometime, long long time ago!

Thursday, January 5, 2017

ఈరోజు ఇంకొక 100

అయ్యా, అమ్మా

వాణిజ్య ప్రకటనలు ఈరోజు ఇంకొక 100 పబ్లిషు చేసినాను.


************

ఎందరో మహానుభావులు, అందరికీ వందనములు. తెలుగుదేశాన ప్రచురణలో ఉన్న, ఉండిన అలనాటి తెలుగు పత్రికలలోని వాణిజ్య ప్రకటనలు - ఆంధ్రపత్రిక, గోలకొండ పత్రిక, ఆంధ్రప్రభ ఇలా ఎన్నో ఎన్నెన్నో (early 1900's) పత్రికలలోని వాణిజ్య ప్రకటనలు ఇక్కడ

http://www.maganti.org/newgen/index1.html లో

ఎడమ వైపున ఉన్న "అలనాటి.." లంకె నొక్కి చూడవచ్చు. మీ వద్ద కూడా ఇలాటివి ఏవన్నా ఉండి, అశేష తెలుగు ప్రజానీకంతో పంచుకోవాలన్న ఆసక్తి ఉంటే దయచేసి ఈమెయిలులో పంపించండి. ఇక్కడ ప్రచురిస్తాను. తమకు తెలిసిన ఇతర విశేషాలు పంచుకోవాలనుకున్న మహానుభావులకి ఎల్లవేళలా ఆహ్వానం.

భవదీయుడు
మాగంటి వంశీ మోహన్

Tuesday, January 3, 2017

దగ్గర ఉన్న 2500 పాత అడ్వర్టసుమెంట్లలో....

అయ్యా, అమ్మా

ఈరోజు కాస్త సమయం చిక్కి, దగ్గర ఉన్న 2500 పాత అడ్వర్టసుమెంట్లలో (19వ శతాబ్దపు మొదటి భాగం నుండి) ఒక 100 పబ్లిషు చేసినాను. ఇంకో 500 సార్టు చేసినవి వచ్చే రెండు మూడు రోజుల్లో... ఆ పైన రెండువేలు ఇంకా సార్టు చెయ్యాలె... చేసిన వెంబడి సమయం చూసుకొని పబ్లిషు చేస్తాను... కాస్త ఓపిక పడితే సంతోషం...

Ok to the point

************

ఎందరో మహానుభావులు, అందరికీ వందనములు. తెలుగుదేశాన ప్రచురణలో ఉన్న, ఉండిన అలనాటి తెలుగు పత్రికలలోని వాణిజ్య ప్రకటనలు - ఆంధ్రపత్రిక, గోలకొండ పత్రిక, ఆంధ్రప్రభ ఇలా ఎన్నో ఎన్నెన్నో (early 1900's) పత్రికలలోని వాణిజ్య ప్రకటనలు ఇక్కడ

http://www.maganti.org/newgen/index1.html లో

ఎడమ వైపున ఉన్న "అలనాటి.." లంకె నొక్కి చూడవచ్చు. మీ వద్ద కూడా ఇలాటివి ఏవన్నా ఉండి, అశేష తెలుగు ప్రజానీకంతో పంచుకోవాలన్న ఆసక్తి ఉంటే దయచేసి ఈమెయిలులో పంపించండి. ఇక్కడ ప్రచురిస్తాను. తమకు తెలిసిన ఇతర విశేషాలు పంచుకోవాలనుకున్న మహానుభావులకి ఎల్లవేళలా ఆహ్వానం.

భవదీయుడు
మాగంటి వంశీ మోహన్