Tuesday, June 17, 2014

కవిత్వం - నరాల్ని, నాడులని ఎలా ప్రభావితం చేస్తుంది?

మీరేం చేస్తుంటారండి ?

నరాలు, నాడులు ఎలా పనిచేస్తయ్యో పరిశోధిస్తూ ఉంటానండి.

పరిశోధక విద్యార్థి అన్నమాట. బాగుంది. ఫలవంతంగా ఉన్నదా?

పరిశోధన ఫలించినా ఫలించకపోయినా బలంగా బలవంతంగా నాకొచ్చిన కవిత్వం నేను రాస్తూ ఉంటానండి.

మీరు కవి కూడానా? బాగుంది. దేనిమీద రాస్తూ ఉంటారు ?

చెప్పాను కదండీ నరాల మీద నాడుల మీద అని.

అది పరిశోధన అన్నారుగా! ఆ మాట విని మీరు డాక్టరేటు వారేమో అనుకున్నా.

భలేవారండి మీరు. కవిత్వంలో కాలేసారు. కవిత్వం, నరాల్ని, నాడులని ఎలా ప్రభావితం చేస్తుంది అన్నది నా పరిశోధన!

ఇదేదో విచిత్రమూ కాక సామాన్యమూ కాక ఇంకేదోగా ఉన్నది.

అంటే మీ నరాలు మీ స్వాధీనంలో లేవన్నమాట.

ఏవిట్రా, నిన్ను తగలెయ్య, నాకు నరాల జబ్బు ఉందంటావా?

ఇంతలోనే అండి నుంచి ఒరేనా. ఇదేనండి, నరాలు స్వాధీనంలో లేకపోటమంటే. నా కవిత ఒక్కటి కూడా చదవలేదు మీరు. అప్పుడే, ఇలా నాడీనరం కోల్పోయి....

మాటలు జాగ్రత్తగా రానీ. తోలు తీసి ఆమూలగా ఒకటి, ఈమూలగా ఒకటి, ఐమూలగా ఒకటి నీ నెత్తికి గడ్డపారతో కుట్టేస్తా.

ఊర్కోండి, నా తలకి ఐమూల ఎక్కడుంది.

ఏదో ఒక మూల, ఇంతకీ ఏవిటంటారు మీరు.

అదీ అలా రండి. ఒరే నుంచి మీరుకు వచ్చేసారు. బాగుంది

సంగతేమిటో చెప్పండి. సోదెందుకు ?

కవిత్వానికి బ్రహ్మాండమైన శక్తి ఉందండి.

శక్తా, సున్నమా! ఏదీ ఒకటి వినిపించు

అదేమిటి మీ కంఠనాళాలు అన్నీ అలా ఉబ్బినాయి?

యెహా ఏదో ఒక ఉబ్బు. ఏదైతే ఏమిటి ?

ఆ ఏమిటి లోనే అంతా ఉంది. నాడీ నాడీ నడుమ నరాలు అంటా నేను.

ఆపండి మహప్రభో మీ నరాల జపం. అసలు కవిత ఏదైనా ఒకటి వినిపించండి.

సరే ఇదిగోండి మీ ఉబ్బిన నరాల కోసం ఒకటి

గుడ్డలేని రోడ్డు
ఐమూలగా కుళ్ళు కాల్వ
పందులతో నీరసరసం
ఐమూలగా మాయమైపోయింది


వీపులేని ఆకాశం
ఐమూలగా మడి మబ్బు
ఏడుస్తూ ఎండుగడ్డి
ఐమూలగా మాయమైపోయింది 


నల్లటి వల్లకాడు
ఐమూలగా శవాలు
ఏడుస్తూ నిద్రలేమి
ఐమూలగా మాయమైపోయింది 


గోటు లేని చోట
ఐమూలగా తీట
రాణివాసపు పేట
ఐమూలగా మాయమైపోయింది

ఆపెయ్! ఆపెయ్! మహాప్రభో ఇది కవితా. అహా! ఏమి సృజన. ఏమి వాత. ఎంత అదృష్టం. నరాలకు అగ్గి పుట్టింది.

చెప్పాను కదండీ, పరిశోధక విద్యార్థినని. నా పనే అగ్గి రాజెయ్యటం. ఆర్పుకోవటం వారి వారి ఇష్టం.



*******************


Part 1
originally written in oct 2012.
Unicoded June 2014

This period of 2009 to 2012 was very interesting writing wise. When I am looking at the content in those tonnes of notepads/papers, now, I feel different.

I should start writing once again, on papers, that is. It is fun - the strikings, the rewrites - it's quite intriguing. Anyways...Thanks for your time. Cheers

No comments:

Post a Comment