Tuesday, January 29, 2013

ఏమిటి దానర్థం అని లోపాయికారీగా వారిని ప్రశ్నించాను!

శ్రీ శ్రీ గారు ఏదైనా సాహితీ సభల్లో పాల్గొనే కవిగార్ల గురించి, ముఖ్య అతిథుల గురించి చెప్పాలంటే ఇలా చెప్పొచ్చునేమో అన్న ఊహ!




*******************************************

"సాహిత్య సభల్లో పేరున్నవారే ముఖ్య అతిథులు కానక్కరలేదు. ఊరూ పేరు లేని కవిగారు కూడ ముఖ్య అతిథి అవ్వొచ్చు. అటువంటి కవిగారిని నేను పేరు చెప్పనవసరం లేని ఒక సాహితీ సభలో కలుసుకున్నాను. ఆయనమాత్రం పేరు లేని వాడు కాడు. చాలా మంచి పేరే ఉంది. అదేదో నేనైతే మరిచిపోయానుగాని, ఆయనంటూ ఉండేవాడు ఏదో ఫర్వాలేదని.

మీ కవితలెలాగ సాగుతున్నాయని అడిగితే ఆయన ఏదో ఫర్వాలేదనడం నాకు జ్ఞాపకం ఉంది. ఏమిటి దానర్థం అని తర్వాత లోపాయికారీగా నేను వారిని ప్రశ్నించాను. అప్పుడు పొద్దువారుతున్న సమయం. అర్థ రాత్రి దాకా అతను తన కవితలు వినిపిస్తూనే ఉన్నాడు. నేరకపోయి అతన్ని కదిలించానుకదా అని నేను మా చెడ్డ బాధపడ్డాను. ఒక్క కవితతో ప్రారంభించి ఊళ్ళో ఉన్న అందరు కవుల కవితలతో సరిపోలుస్తూ ఆయన ఏకరువు పెడుతున్నాడు. ఏదో ఫర్వాలేదని ఆయన ఎందుకన్నాడో మాత్రం బోధపడలేదు. ఆకలేస్తున్నదని చెప్పి అక్కణ్ణించి వెళ్ళిపోయాను.

మర్నాడు ఆయన ముఖ్య అతిథిగా నేను వెళ్ళవలసిన సాహిత్య సభ రద్దయ్యింది. కారణం ఆ సభకు ఒక్కరంటే ఒక్కరే వచ్చారని. ఆ వచ్చినాయన ఆ కవిగారేనని. అప్పుడు తెలిసింది నాకు ఏదో ఫర్వాలేదు అంటే ఏమీ లాభం లేదు అని. "

*******************************************