Saturday, June 2, 2012

అగ్ని పర్వతం - రెంటాల గోపాలకృష్ణ

అగ్ని పర్వతం

-- రెంటాల గోపాలకృష్ణ (1952)


మానవాళి పగతో నిండిన
మధ్యందిన భానుమండలం
                                    సంఘర్షణ!

బిగబట్టిన పిడికిలి చలిలో
రేగిన అగ్నిజ్వాలల జిహ్వలు
                                      సంహారం!

యువకంఠం చీచుకవచ్చే
ఊపిరి విసిరేసిన కేకలు
                                      సంగ్రామం!

ఉషఃకాల జల దుద్భవమౌ
అరుణారుణ రేఖావళులే
                                          సంక్షోభం!

కార్మిక కర్షక జనముల
రక్తచ్ఛాయ పతాకం
                                          సంకేతం!

నగశిఖరాగ్రములు పగిలి
నగరవీధి నిండిన జనం
                                             సంకీర్ణం!

మరచక్రపు మంటల గంటలు
మారుమ్రోగు కంఠారావం
                                               సందేశం!

పాడుపడ్డ గుడిమూలల్లో
పాడుతున్న ఆకలి గొంతుక
                                                సంగీతం!

జడతను శాసించుచు పలికిన
జగజ్జనత కవితాగీతిక
                                                 సాహిత్యం!

విశాల విశ్వాలయ గోపుర
మొక్కటిగా నిలబెట్టుట
                                                  సమధర్మం!

No comments:

Post a Comment