Tuesday, June 5, 2012

ఐకమత్యం - శ్రీశ్రీ - 1952

ఐకమత్యం

-- శ్రీశ్రీ (1952, Jan 15 ఉదయిని)


ఐక్యం అదీ మనకి ముఖ్యం
అందులోనే వుంది సౌఖ్యం
లేనిపోని చీలికలు
రెండు రెండు నాలికలు
ఛీ యిదా బతుక్కి
ఫాయిదా


ఐక్యం అదీ వ్యవస్థ
అప్పుడుండదు మనకీ అవస్థ
కాదు ఔను అవును
కాదు కాదు అవదు
అనేకం అయితే ఏకం
అదే వివేకం

ఐక్యం అన్నింటికీ మూలం
అటే కదుల్తోంది కాలం
పురోగతికి ప్రపంచనీతి
మనదొకే మానవజాతి
వ్యక్తికి బహువచనం
శక్తి

ఐక్యం అదే మనకి గమ్యం
అప్పుడే సిద్ధిస్తుంది సామ్యం
వ్యర్థం స్పర్ధంటా
యుద్ధం వద్దంటా
కామ్యం ఐక్యం అయిన బతుకే
రమ్యం


ఐక్యం ఎప్పుడో కాదిప్పుడే
ఎక్కడోకాదు అదిక్కడే
మాట చేతగామారి
మనిషి మనిషితో చేరి
స్వప్నం సత్యం ఐతేనే
స్వర్గం

No comments:

Post a Comment