Wednesday, November 16, 2011

"సామిధేని" - "కాగితమే కంపించింది" - శ్రీ శ్రీరంగం నారాయణబాబు

సామిధేని

-- శ్రీ శ్రీరంగం నారాయణబాబు

రక్త పతాకం
శక్తి నాలుక
అగ్ని కిరీటం
ఆకాశమున
మునిమాపు
కేకలు వేస్తూ
పిలిచింది;

కాలం నాగు
వినువీధుల్లో
వెన్నెలపడగ
విప్పింది

శారదరాత్రి
శంకరుఫాలం
బూదిపవిత్రత
బూరా ఊదింది
దేహం వీడి
దేశం వీడవు
దిక్కుల ఉరి
కొయ్యలనుండి
దేశనాయకుల
ప్రాణాలు
మూగగాలులు
మూలుగుతు వీచాయి;

హంతకు చేతిని కత్తులు
వింతహృదయమున భావాలు
శిరసున రతనము
గళమున విషమ్ము
కలమ్ము కొసలో
కాటుక మబ్బులు
కాగితమే కంపించింది
పాటే
గ్రహపాట?

సూరన అడిదాన్ని
తిక్కన ఖడ్గాన్ని
పేలిన బిజాపూరు
ఫిరంగి గుండు
నా గుండె!

(రుధిర జ్యోతి నుండి - ప్రతిభ పత్రిక 1938 సంచిక నుంచి)

No comments:

Post a Comment