Monday, October 13, 2008

విఘ్నం రాకూడదని గాడిదనెందుకండీ ధ్యానించడం?

మహా మహోపాధ్యాయ వేదము వెంకటరాయశాస్త్రి గారు ఒక సభలో ప్రసంగిస్తూ - " ప్రతిమాటకీ, శ్లోకానికీ అర్ధము, విపరీతార్ధమూ కూడా చెప్పవచ్చు. ఉదాహరణకు 'శుక్లాంబరధరం' అనే శ్లోకానికి గాడిద పరంగా అర్ధం చెప్పవచ్చు ' అని అన్నారట.

అదెలాగో చెప్పండని అడిగాడొకాయన సభలో నుంచి. వేదం వేంకటరాయ శాస్త్రిగారు - 'శుక్ల అంటే తెల్లనైన, అంబర అంటే వస్త్రములను, ధరం అంటే ధరించినదియు అనగా మోయుచున్నట్టిదియు, విష్ణుం అంటే వ్యాపించినట్టిదియు అనగా ఒక చోట స్థిరముగా వుండక తిరుగునదియు, శశి వర్ణం అంటే బూడిదరంగు కలిగినదియు, చతుర్భుజం అంటే నాలుగు కాళ్ళు కలదియు, ప్రసన్న వదనం అంటే దాని ముఖం ఎంత ప్రసన్నము, అట్టి దానిని అన్ని విఘ్నములను ఉపశమించుటకు ధ్యానించుచున్నాను ' అని చెప్పారట.

'అయితే విఘ్నం రాకూడదని గాడిదనెందుకండీ ధ్యానించడం' అని మళ్ళీ అడిగాడు మొదటి ప్రశ్న వేసిన పెద్ద మనిషి. 'ఓ గాడిదా ! మా ఉపన్యాసమునకు అడ్డు రాకుమా. మా పనికి మాటిమాటికీ అడ్డు రాకుమా అని మా ప్రార్ధన ' అని అన్నారట శాస్త్రి గారు. ఆ పెద్దమనిషి మరి నోరు ఎత్తలేదు.

4 comments:

  1. నేను ఇది గణపతి (చిలకమర్తి లక్ష్మీనరసింహం) రచనలో చదివాను. పూర్తిగా ఇలా ఉంటుందని కాదు, ఆ శ్లోకానికి విపరీతార్థం మాత్రం ఉంటుంది. ఈ టపా చదవగానే, ఇదింకెక్కడో చదివినట్టుందే అనిపించింది.

    ఇంతకీ మీరెక్కడ చదివారు?

    ReplyDelete