Wednesday, September 3, 2008

ఎన్నో విషయాలలో వారికీ నాకూ చుక్కెదురు!

విశ్వనాథను పొగిడిన శ్రీశ్రీ

"నేను చిన్నతనంలో కలం పట్టిన కొత్తరోజుల్లో నన్ను బాగా ఆకర్షించిన ఇద్దరు కవులలో విశ్వనాథవారొకరు. నేనంటే సత్యనారాయణగారికి వాత్సల్యం. వారంటే నాకు గౌరవ భావం. ఎన్నో విషయాలలో వారికీ నాకూ చుక్కెదురు. అయినా భారతీయ భాషలన్నిటిలోనూ ఒక్క తెలుగులోనే గొప్ప కవిత్వం ఉందనడంలో ఇద్దరమూ ఏకీభవిస్తాం."

శ్రీశ్రీ - జూన్ 9, 1973న విశ్వనాథకి "ఉడుగర"గా ఇలా సమర్పించాడు

"మాటలాడే వెన్నెముక
పాటపాడే సుషుమ్న
నిన్నటి నన్నయ్యభట్టు
ఈనాటి కవి సమ్రాట్టు
గోదావరి పలుకరింత
కృష్ణానది పులకరింత
కొండవీటి పొగమబ్బు
తెలుగువాళ్ళ గోల్డునిబ్బు
అకారాది క్షకారాంతం
ఆ సేతు మిహీకావంతం
అతగాడు తెలుగువాడి ఆస్తి
అనవరతం తెలుగునాటి ప్రకాస్తి
ఛందస్సు లేని ఈ ద్విపద
సత్యానికి నా ఉపద

(శ్రీశ్రీ వ్యాసాలు నుంచి)

5 comments:

  1. ఆహా. విశ్వనాథవారిపై శ్రీశ్రీకి ఇలాంటి గురుతుల్యభావనేదో కూడా ఉందనే అనుకున్నాను.

    "మాటలాడే వెన్నెముక, పాటపాడే సుషుమ్న" అన్న వాక్యాలలోని భావం నాకు పూర్తిగా అర్థం కాలేదు.

    తరువాత, "సత్యానికి నా ఉపద" అని విశ్వనాథ సత్యనారాయణగార్ని ఏదో మేనత్తకొడుకు పిలిచినట్టుగా ఎంత ధైర్యంగా అన్నారాయన? అదీ చొరవంటే.

    ఇది చదవగానే నాకు మీరడిగిన "అసలు ఏమవుతోంది ఈ మధ్య మన తెలుగు బ్లాగు ప్రపంచంలో?" ప్రశ్నే గురుతొచ్చింది.

    అంత (చుక్కెదురైయే) హేమాహేమీలే పరస్పర వాత్సల్యగౌరవాలతో ఉండగాలేనిది...
    అనిపించింది.

    ReplyDelete
  2. విశ్వనాధవారిమీద శ్రీశ్రీ విసుర్లగురించి కూడా రాయండి...

    ReplyDelete
  3. సుషుమ్న
    According to Brown:
    The pineal gland, the spinal marrow: a nerve imagined to extend from the spine to the nose. In Colebrooke's Essays, Vol.1, p.154, he interprets sushmuna as 'a ray of the sun which becomes the moon'.

    ReplyDelete
  4. స్వరూప్‌గారూ,

    ఈ సుషుమ్న అన్నది మానవశరీరంలోని మూడు ప్రధానమైన నాడులలోనొకటి. ఇడ, పింగళ అని మిగతా రెండూను. సాధారణంగా ప్రాణవాయుప్రసారం ఈ ఇడ,పింగళల గూండా జరుగుతుందని చెప్తారు. ఎప్పుడైతే యోగమార్గంలో సాధకుడు సుషుమ్నద్వారా ప్రాణవాయువును పంపగలరో, అప్పుడు కుండలినీ శక్తి జాగృతమౌతుందని, అలా జాగృతమై కుండలిని ఊర్ధ్వదిశగా సుషుమ్నగూండా ప్రయాణించి షట్చక్రములనూ దాటి సహస్రారాన్ని చేరడం యోగసాధనలో ముఖ్యోద్దేశ్యమని, అలా కుండలిని సహస్రారస్థానానికి చేరడమే మోక్షమనీ చెప్తారు.

    నాకు అర్థం కానిది... అసలు మాటలాడే వెన్నెముక, పాటపాడే సుషుమ్న అని ఎందుకన్నారూ శ్రీశ్రీ, దానిలో అంతరార్థం ఏమిటా అని!

    ReplyDelete
  5. Raghava garu,
    out of my depth. ఇంతకు ముందు నాకు ఆమాట అర్థముకూడ తెలియదు.

    ReplyDelete