POLL - ఘంటసాల మాష్టారా? రజనీ గారా? ఈ దండకాలకు దండలు ఎవరికి?

ఏమిటీ హెడ్డింగు? బుద్ధుందా అసలు నీకు?

ఉంది కాబట్టే ........

ఇంతకీ సంగతేమిటి? కథా కమామీషు వివరించుకో!

ఘంటసాల మాష్టారు పాడిన శ్యామలా దండకం నభూతో నభవిష్యతి  అని అనుకుంటూ ఉండేవాడినా? నేనేమిటి ఈ భూప్రపంచకంలో పాటలు వినేవాడెవడైనా అలాగే అనుకుంటాడన్న సంగతి నీకు కూడా తెలుసుగా?  వేరే మాట లేకుండా పటాపంచలు అయిపోయింది.

ఏమిటి పటాపంచలయ్యింది? పాటా? నీ అభిప్రాయమా? నిన్ను తగలెయ్య! సరిగ్గా చెప్పు

అభిప్రాయం నాయనా! అభిప్రాయం.

ఎలా? ఘంటసాల మాష్టారుని మించినవారు లేరయ్యా ఈ సంగీత ప్రపంచంలో!

ఒప్పుకున్నా, కానీ ఈ దండకానికి కాదు...

మరి? ఎవరున్నారో చెప్పు!

బాలాంత్రపు రజనీకాంతరావు గారని ఒకాయన ఉన్నారు, తెలుసా నీకు? ఆయన ఘంటసాల మాష్టారు గాత్రాన్ని ఆవగింజంత చేసేసారేమో అన్న అనుమానం వచ్చేసింది.

ఎలా?

పరుచూరి శ్రీనివాస్ గారి దగ్గరినుంచి బాలాంత్రపు రజనీకాంతరావు గారి శ్యామలా దండకం ఆడియో వచ్చింది. విన్నా! ఆ దండకంలోని చివరి ఎనిమిది నిముషాల భాగం వింటూంటే , వెంటనే లేచి నించున్నాయి!

ఏమిటి నుంచున్నాయి?

ఒంటి మీద వెంట్రుకలు! సూదుల్లాగా, అంపశయ్య మీది బాణాల్లాగా నిక్కబొడుచుకుని పోయినాయి....దండకంలోని ఆ ఎనిమిది నిముషాల భాగం ఆగేంతవరకూ అలా నిటారుగానే ఉండిపోయినాయి.....

ఏదీ? నన్ను కూడా విననీ , చూద్దాం! ఏం నుంచుంటాయో?

సరే ఇక్కడ విను....

ఒక్కటే మాటయ్యా - ఈ నా అభిప్రాయంతో నీ అభిప్రాయాన్ని నా దారి పట్టిస్తున్నాననుకునేవు! నా సోది పక్కనబెట్టి సుమారు పధ్నాలుగు నిముషాల ఈ ఆడియో  తీరిగ్గా విని, కామెంటు రూపంలో చెప్పు .

మీలో చాలామందికి మొదటిసారి వినగానే "నుంచోకపోవచ్చు" కానీ, ఓ ఐదారు సార్లు విన్న తర్వాత "నుంచుంటాయి"....నాదీ పూచీ.....కొద్దిమందికి మొదటిసారి వినగానే నుంచుంటాయి...వారు ధన్యులు 

***************************************************

***************************************************

ఈ క్రింది సూర్య దండకం ఘంటసాల మాష్టారు పాడితే ఎలాగుండేదో కానీ, ఇప్పటికీ ఎప్పటికీ ఈ దండకానికి రజనీకాంతరావు గారే నెంబర్ వన్ అని నా నమ్మకం! -

 ఆ సూర్య దండకం కూడా వినిపించు !

ఇదిగో ఇక్కడ వినుకో -



I will say just one thing - Brilliant! Brilliant! Brilliant! Though I have been listening to this danDakam from Sri BR since ages - it MOVES me, every single time I listen to it

వైష్ణవికి నేర్పుదామని ఓ రెండు వారాల క్రితం ఆవిడకు వినిపించా! దండకం అయిపోగానే ఏమందో తెలుసా?

Daddy, I want to go to that thaata and sing with him

కదిలిపోయా! గుండెలకు హత్తుకుని ఓ ఐదు నిముషాలు వదిలిపెట్టలా చిన్నమ్మిని!

అదండీ సంగతి! 

దండకం ఈ క్రింద  :

శ్రీ సూర్యనారాయణా వేద పారాయణా లోక రక్షామణీ దైవ చూడామణీ

సూర్యనారాయణా వేద పారాయణా లోక రక్షామణీ దైవ చూడామణీ

ఆత్మ రక్షా నమః పాపశిక్షా నమో విశ్వకర్తా నమో విశ్వభర్తా నమో దేవతా చక్రవర్తీ పరబ్రహ్మమూర్తీ త్రిలోకైక నాధాధినాధా మహాభూత భేదంబులున్ నీవయై బ్రోవుమెల్లప్పుడున్ భాస్కరా హస్కరా

సూర్యనారాయణా వేద పారాయణా లోక రక్షామణీ దైవ చూడామణీ

పద్మినీ వల్లభా వల్లకీ గానలోలా త్రిమూర్తిస్వరూపా విరూపాక్షనేత్రా మహా దివ్యగాత్రా అచింత్యావతారా నిరాకారా ధీరా పరాకయ్య ఓయయ్య దుర్దాంత నిర్ధూత తాపత్రయా భీలదావాగ్ని రుద్రా తనూద్భూత నిస్సార గంభీర సంభావితానేక కామాద్య నీకంబులన్ దాటి యేకాకినై చిక్కి యే దిక్కునున్ గానగా లేక యున్నాడ నీవాడనో తండ్రీ

సూర్యనారాయణా వేద పారాయణా లోక రక్షామణీ దైవ చూడామణీ

జేగీయమానా కటాక్షంబునన్ నన్ గృపాదృష్టి వీక్షించి రక్షించు వేగన్ మునీంద్రాది వంద్యా జగన్నేత్ర మూర్తీ ప్రచండస్వరూపుండవై యుండి చండాంశు సారథ్యమన్ గొంటి ఆకుంటి యశ్వంబులేడింటి చక్రంబులున్ దాల్చి త్రోలంగ మార్తాండ రూపుండవై చెండవా రాక్షసాధీశులన్ కాంచి కర్మానుసారాగ్ర దోషంబులన్ ద్రుంచి కీర్తి ప్రతాపంబులన్ మించి నీ దాసులన్ గాంచి ఇష్టార్థముల్ కూర్తువో

సూర్యనారాయణా వేద పారాయణా లోక రక్షామణీ దైవ చూడామణీ

దృష్టివేల్పా మహా పాప కర్మాలకున్నాలయంబైన యీ దేహభారంభభారంబుగానీక శూరోత్తమా ఒప్పులన్ తప్పులన్ నేరముల్ మాని పాలింపవే పట్టి నీ కీర్తి కీర్తింప నేనేర్తునా ద్వాదశాత్మా దయాళుత్వమున్ తత్త్వమున్  జూపి నా ఆత్మ భేదంబులన్ బాపి పోషింప నీవంతు నిన్నున్ బ్రశంశింప నా వంతు ఆ శేషభాషాధిపుల్ కానగాలేరు నీ దివ్యరూప ప్రభావంబు కానంగ నేనెంత ఎల్లప్పుడున్ స్వల్పజీవుండనౌదున్ మహాకష్టుడన్ నిష్టయున్ లేదు నీ పాదపద్మంబులే సాక్షి దుశ్చింతలన్ బాపి నిశ్చింతుగన్ చేయవే కామితార్ధప్రదా

సూర్యనారాయణా వేద పారాయణా లోక రక్షామణీ దైవ చూడామణీ

శ్రీమహాదైవరాయా పరావస్తులైనట్టి మూడక్షరాలన్ స్వరూపంబు నీదండకంబిమ్మహిన్ వ్రాయ కీర్తించి విన్నన్ మహాజన్మ జన్మాంతరవ్యాధి దారిద్ర్యముల్ పోయి కామ్యార్ధముల్ కొంగు బంగారు తంగేడు జున్నై ఫలించున్ మహాదేవ దేవా నమస్తే నమస్తే నమస్తే నమహా