శ్రీ గుడిపూడి శ్రీహరి పరిచయ కార్యక్రమం / శ్రీ బూదరాజు రాధాకృష్ణ జ్ఞాపకాలు ప్రసంగ కార్యక్రమం

ఆడియోలు - తెలుగుథీసిస్.కాం రంజని గారి  సౌజన్యంతో   

ఎక్కడ? ఇక్కడ....

ఈ లింకు నొక్కి వెబ్సైటుకు వెళ్ళాక ఎడమవైపున ఉన్న "పరిచయాలు - నాటికలు" లింకు నొక్కి వినవచ్చు
 
బ్రహ్మాండమైన విశేషాలున్నాయి ఈ రెండు కార్యక్రమాల్లో

భవదీయుడు
వంశీ

AIR Seeks Material For Website Archive! - The Hindu News - ఈ లైన్లు మటుకు పట్టి చదవండి!

 

ఈరోజు హిందూ లో వార్త

మొత్తానికి కలలు నిజాలవుతున్నాయన్నమాట.....

వార్త అందించిన మిత్రులు పి.వెంకట రమణ గారికి బోల్డు కృతజ్ఞతలతో 

వార్తలోని ఈ లైన్లు మటుకు పట్టి చదవండి....
"
AIR is also inviting persons who have been associated with the organisation in any manner and their descendents, public and other institutions to share any material---textual, photographic, audio or even memories and anecdotes—available with them.The material will be acknowledged/returned with thanks after suitably digitising them
"

ఆశ్చర్యం కలిగిస్తుంది....ఎంతమంది వద్దనున్నవి పంచుకుంటారో అన్నది చాలా ఆసక్తికరమైన విషయమే ! ఎన్ని ఆణిముత్యాలు బయటకొస్తాయో చూడాలి.....


వంశీ 

ఆకాశవాణి కళాకారుల సంక్షిప్త జీవితాలు - 100 రూపాయలు మాత్రమే !!

ఆకాశవాణి కళాకారుల సంక్షిప్త జీవితాలు చక్కగా గుదిగుచ్చి రేడియో అభిమానుల అందుబాటులోకి తెచ్చిన అంబడిపూడి మురళీకృష్ణ గారు, మడిపల్లి దక్షిణామూర్తిగారు  ఎంతైనా అభినందనీయులు.

పుస్తకం: వాచస్పతి
వెల : 100 రూపాయలు
ముద్రణ: కళాజ్యోతి ప్రాసెస్స్ ప్రైవేట్ లిమిటెడ్
ప్రతులకు: 402 ప్రేమ సాయి అపార్ట్మెంట్స్
శ్రీనగర్ కాలనీ, హైదరాబాదు - 73

ఈ పుస్తకంలో నాకు బాగా నచ్చింది అన్నిటికన్నా చక్కనైన ఆయా కళాకారుల చిత్రాలు....

ఈ ప్రతిని నాకు ఎంతో అభిమానంగా అందజేసిన శ్రీ పి.వెంకట రమణ (అసిస్టెంట్ స్టేషన్ డైరెక్టర్) గారికి హృదయ పూర్వక కృతజ్ఞతలతో

ఇప్పుడో ప్రశ్న -

ఈ బొమ్మెవరిదో చెప్పుకోండి...

అలాగే "ప్రసార ప్రముఖులు" అనే మంచి రచన ఒకటి ఉన్నది - ఆకాశవాణి స్టేషన్ డైరెక్టర్ డాక్టర్ అనంత పద్మనాభరావు గారు వ్రాసింది - ఈ పుస్తకంలో బోల్డు ఆణిముత్యాల్లాంటి వివరాలు, కళాకారులు, ఆర్టిస్టులు, ఆకాశవాణి కేంద్రాలు, ఆకాశవాణి మూలస్థంభాలు, ఆకాశవాణి పుట్టుపూర్వోత్తరాలతో సహా!

వెబ్సైటులో ప్రసార ప్రముఖులు సెక్షన్లో చూడవచ్చు..

భవదీయుడు
వంశీ

ఆకాశవాణిలో ఎవరా దంపతులు? ఏమా కథా? - Part 1

ఆకాశవాణిలో పనిచేసిన దంపతుల ఫొటోలు పరిచయం చేయటం ఈ మొదటి భాగం ఉద్దేశం...

ఆకాశవాణిలో తొలి జంట (దంపతులు)  లేదా ప్రముఖమైన జంట - రేడియో అన్నయ్య, అక్కయ్య గార్లు అని అనవచ్చునేమో. 

శ్రీ న్యాయపతి రాఘవరావు గారు, శ్రీమతి న్యాయపతి కామేశ్వరి గార్ల గురించి ఆకాశవాణి అభిమానులకు  చెప్పాల్సిన పని లేదు...చిత్ర సౌజన్యం: balanandam.co.in

ఆ తర్వాత నాకు ప్రస్తుతం అందుబాటులో ఉన్న జంటల్లో ముందుగా ఇలియాస్ అహ్మద్, జ్యోత్స్న గారి చిత్రాలు. అడగగానే చిత్రాలు అందించినందుకు ఇలియాస్ గారికి సహస్ర కృతజ్ఞతలు...

ఇలియాస్ అహ్మద్ గారు ముప్ఫై ఏళ్ళు ఆకాశవాణిలో (1972 - 2002) పనిచేసారు. తన సుమధుర కంఠంతో ఎంతో మందిని అలరించిన ఇలియాస్ గారు జ్యోత్స్న గారిని వివాహమాడారు. జ్యోత్స్న గారు ఆకాశవాణి హైదరాబాదు కేంద్రంలో అనౌన్సరుగా మంచి పేరు తెచ్చుకున్నారు. దంపతులిద్దరూ నవలా రచయితలన్న విషయం ఎంతమందికి తెలుసో కానీ, రచనా రంగంలో కూడా మంచి పేరు తెచ్చుకున్నారు. చిత్రాలు ఇక్కడ.....

అలాగే శ్రీ అల్లంరాజు వెంకటరావు (సుధామ), శ్రీమతి ఉషారాణి (1991 నుండి ప్రోగ్రాం ఎక్సెక్యూటివ్) దంపతుల చిత్రాలు ఇక్కడ.. ప్రఖ్యాత కార్టూన్ చిత్రకారులు, రచయిత, కవి  అయినటువంటి సుధామ గారి గురించి మరింత వివరంగా వెబ్సైట్లో చదవండి ...అడగగానే చిత్రాలు అందించినందుకు సుధామ గారికి సహస్ర కృతజ్ఞతలు...చిత్రాలు ఇక్కడ....

త్వరలో ఇతర జంటల చిత్రాలు మీ ముందుకు - ఎవరా దంపతులు? ఏమా కథా? వీరే

అ) శ్రీ.ఎన్.ఎస్.శ్రీనివాసన్ (సంగీత విభాగం ప్రొడ్యూసర్), శ్రీమతి శారదా శ్రీనివాసన్
ఆ) ఆకెళ్ల సత్యనారయణ (నటుడు - నాటక రచయిత) , శ్రీమతి ఆకెళ్ల సీత
ఇ) శ్రీ పన్నాల సుబ్రహ్మణ్య భట్,  శ్రీమతి ముంజులూరి కృష్ణకుమారి
ఈ) శ్రీ ఎన్.బాబూ రావు, శ్రీమతి ఝాన్సీ కె.వి.కుమారి
ఉ) శ్రీ మంత్రివాది మహేశ్వర్, శ్రీమతి వసుమతి
ఊ) శ్రీ కలగా కృష్ణమోహన్, శ్రీమతి పరిమళ
ఎ) శ్రీ రాఘవరెడ్డి, శ్రీమతి పులికంటి అమృత
ఏ)....
ఐ)....
ఒ)...
ఓ)....
ఔ) ష్...ష్...సస్పెన్సన్నమాట

డాక్టర్ అనంతపద్మనాభరావు గారు తన రచన ప్రసార ప్రముఖులు లో - "వీరిని ప్రసార ప్రేమికులనవచ్చు. ఇది ఆకాశవాణి ప్రత్యేకత" అని అంటారు...

ఇతర ప్రసార ప్రముఖుల చిత్రాలు - వెబ్సైట్లో "ప్రసార ప్రముఖులు" సెక్షన్లో చూడవచ్చు

భవదీయుడు
వంశీ

దేశప్రజలకు ఆకాశవాణి, దూరదర్శన్ ల బహిరంగలేఖ

అక్టోబరు 26న ఆంధ్రజ్యోతిలో ప్రచురితమైన "ఆకాశవాణి / దూరదర్శన్ ప్రోగ్రాం స్టాఫ్" ఆవేదన

జయహో ప్రసార భారతి , జయహో భారత ప్రభుత్వం!

వార్త అందించిన మిత్రులు వెంకట రమణ గారికి కృతజ్ఞతలు 

"వడ్డెర చండీదాస్ రచనలు - తత్త్వం" ఆకాశవాణి పరిచయ కార్యక్రమం

"శ్రీ వడ్డెర చండీదాస్ రచనలు - తత్త్వం"

ఈ అంశం మీద హైదరాబాదు కేంద్రీయ విశ్వవిద్యాలయం లో తత్త్వశాస్త్ర ఆచార్యులుగ పనిచేస్తున్న డాక్టర్ అడ్లూరి రఘురామరాజుగారితో పరిచయ కార్యక్రమం 

ఆకాశవాణి హైదరాబాదు కేంద్రం ప్రసారం
పరిచయకర్త : శ్రీ సుమనస్పతిరెడ్డి (PEx, AIR)
ప్రసారం తేదీ : 23 October 2010
ఆడియో - రంజని గారి (తెలుగుథీసిస్.కాం) సౌజన్యంతో   

ఎక్కడ? ఇక్కడ....

ఈ లింకు నొక్కి వెబ్సైటుకు వెళ్ళాక ఎడమవైపున ఉన్న "పరిచయాలు - నాటికలు" లింకు నొక్కి వినవచ్చు
 
ఏదేమైనా ఆసక్తికరమైన విషయాలున్నాయి ఈ పరిచయ కార్యక్రమంలో

భవదీయుడు
వంశీ

శ్రీ వి.ఏ.కె.రంగారావు గారితో ఇంటర్వ్యూ

ప్రముఖ సంగీత విద్వాంసులు శ్రీ చల్లా కృష్ణమూర్తి గారి కుమార్తె, డాక్టర్ చల్లా విజయలక్ష్మిగారు తన పరిశోధక గ్రంథం "ఆంధ్రదేశ సంస్థానాలు - సంగీత వాఙ్మయం" లో ఆయా సంస్థానాల సంగీతపోషణ గురించి విస్తృతంగా వివరిస్తారు. తన పరిశోధనలో భాగంగా చాలా మంది ప్రముఖులను ఇంటర్వ్యూలు కూడా చేసారు.

ఆ ఇంటర్వ్యూ లు సంక్షిప్తంగా తన పుస్తకంలో ప్రచురించారు. ఆ ఇంటర్వ్యూలలో ఒక ఇంటర్వ్యూ - శ్రీ వి.ఏ.కె.రంగారావు గారితో ఉన్నది. ఆ ఇంటర్వ్యూ భాగం ఇక్కడ చూడవచ్చు. అడగగానే ఆ ఇంటర్వ్యూను, పుస్తకాన్ని  వెబ్సైట్లో ప్రచురించుకోడానికి అనుమతి ఇచ్చినందుకు డాక్టర్ చల్లా విజయలక్ష్మి గారికి సహస్ర కృతజ్ఞతలు.

మిగిలిన ఇంటర్వ్యూలు కూడా త్వరలో పి.డి.ఎఫ్ లుగా మీ ముందుకు

పూర్తి పుస్తకం "సంస్థానములు" సెక్షన్లో చూడవచ్చు. ఈ పుస్తకంపై సర్వ హక్కులు డాక్టర్ చల్లా విజయలక్ష్మిగారికే చెందుతాయనీ, ఎవరైనా వాడుకోదలిస్తే ముందుగా వారి అనుమతి తీసుకోవాలని తెలియచేసుకుంటున్నాను.


భవదీయుడు
వంశీ

బ్లాగుల్లో బిరుదులు!

విషయంలోకి తొంగి చూస్తే - ఈ బిరుదుల కథ బహు పసందైనది.... ఐతే ఏ కథకైనా వెనకాల ఇంకొన్ని కథలుంటాయిట. మీరేమన్నా అనండి ఈ కథల వెనక ఉండే కథల్తో గొప్ప చిక్కులున్నాయి... అసలు కథేమిటో తెలీకుండా ముందుకాళ్ళకు కళ్ళాలు వేస్తాయి...అసలు కథ ముందుకు సాగదు. అలాగని వెనక్కూ పోదూ. అసలు ఈ శల్య పాత్ర పోషించడానికే అసలు కథల ముందుకొచ్చే వెనక కథలున్నాయి. అసలు కథ వెనకమాల కథల పరిస్థితేమిటో తీరిగ్గా తర్వాత ఎప్పుడన్నా...

అసలు కథ మటుకు ముచ్చటించుకుందాం.... ఏమిటంటే అప్పుడెప్పుడో రాజులు, చక్రవర్తులు ఉండే కాలంలో వందిమాగధుల లొల్లాయి పాదార్చనే ఈ బిరుదులకు మూలమని పరమపిత చెపుతున్నాడు.

మరి ఆ వందిమాగధుల పుట్టుపూర్వోత్తరాల్లోకి వెళ్ళిపోతూ ఓ రెండు ఉపోద్ఘాతం మాటలు - ఏ తల్లైనా కనేప్పుడు ఇద్దర్ని కంటుందిట. ఒక బిడ్డ మనిషి రూపంలో ఉన్న బిడ్డైతే...ఇంకో బిడ్డ ఆ మనిషిని అంటిపెట్టుకునుండే స్వార్థం. అలా మనిషి జన్మెత్తిన జీవి, ఇతర జీవులతో కలిసినప్పుడు జిల్లేడు పాలు కంట్లో పోసిన విధంగా ఒక రకమైన జిల మొదలవుతుంది. గోకడం మొదలవుతుంది. ఉపోద్ఘాత ఘాతం సమాప్తం!

వీపులు గోక్కోడం కూడా ఒక రకమైన స్వార్థమే! ఆ గోకడం ఎక్కువైతే వచ్చే తిప్పలు కోకొల్లలు. కారే రక్తాలు గంగాళాలు. దానికే తెలివిజీవైన మనిషి "సంఘ జీవితం" అనే ముసుగు కప్పుతాడు. కొండొకచో బిరుదులు అనే శరీరానికి "గోకుడు" ఆధారస్తంభమైన వెన్నెముక. వెన్నెముక ఎంత గట్టిగా ఉంటే బిరుదు కూడా అంతే గంభీరంగా, డాంబికంగా, రాజసంగా ఢంకా బద్దలు కొట్టేటట్టుంటుంది.

కవి కౌస్తుభ, పద్య కళా ప్రవీణ, గద్య కళా ప్రవీణ, అపర ఘంటసాల, ప్రపంచ ప్రఖ్యాత కవీశ్వర ఇలాటివి చిన్నగోకుడు బిరుదుల్లోకి వస్తే, కొద్దిగా పెద్ద గోకుడు బిరుదులూ ఉన్నాయి. కావ్య కళానిధి, కావ్య పెండేర గండరగండ, పరిశోధన పరమేశ్వర, కథా భీష్మ మొదలైనవి - ఇవీ....మరియు ఇలాటివి - ఇంటివాసాలు అన్నీ ఓ చోట చేర్చి పొగబెట్టి అందులో ఇంగువ విసిరి ఆ కంపును ఆఘ్రాణింపచేస్తూ తూగుటుయ్యాల ఊపే స్వచ్ఛమైన దేశీ బిరుదులు.

ఇహ ఆంధ్రా కీట్స్, ఆంధ్రా మిల్టన్, ఆంధ్రా కాఫ్కా, ఆంధ్రా నబొకొవ్. అగాథ క్రిస్టీ ఆఫ్ ఐదరాబాదు - ఇవి అన్యదేశ్యాలు, విదేశీ వాసన ఎక్కువైన తామర బిరుదులు. ఆంధ్రదేశంలో బహు కొద్దిమందికి తెలిసిన కాఫ్కాని, నబొకోవ్ను పట్టుకొచ్చి ఆంధ్రదేశంలో ఇతర "కౌ"లతో నెమరేస్తూ కాలం గడుపుతూ బభ్రాజమాన తేజంతో దగద్ధగాయమానంగా వెలుగొందుతున్న "కౌ" పితామహులకు కౌపీన ప్రదాన సమేతంగా ఆ బిరుదు అందచేసి -ఇచ్చినవారూ, పుచ్చుకున్నవారూ ఆనందించే రోజులివి.

ఐతే గోకడం కూడా ఒక కళ. అవతలి గోకుడు గాళ్ళతో ఈ పాకుడు గాళ్ళకున్న సాన్నిహిత్యాన్ని బట్టి సున్నితంగా గోకొచ్చు. గట్టిగా గోకొచ్చు. ఇంకొద్ది గట్టిగా గోకొచ్చు. రక్తం రాకుండా పెచ్చు మాత్రమే లేచేట్టు గోకొచ్చు. పెచ్చు లేచి ఒకే ఒక రక్తపు బొట్టు వచ్చేట్టు గోకొచ్చు. గంగా ధారలొచ్చేట్టు లోతుగా గోకొచ్చు, ఇవతలి వారికున్న రోగం మనకంటుకోకూడదనుకున్నప్పుడు గాల్లో గోకి సంతృప్తి పడొచ్చు. ఇలా బోల్డు రకాలు.  

ఈ బిరుదులందుకున్నవాళ్లతో కొంత తంటా కూడా ఉన్నది...గోకుడు సుఖంతో కాళ్లు బారజాపి కూర్చున్న ఆ మహానుభావుడిని మీకు బిరుదెందుకిచ్చారండీ అని ఒక ప్రశ్న వేసామనుకోండి - కనపడే చిత్రాలు ఇవీ:

తడిసిన నులక మంచం కుక్కిలా బిర్రబిగుసుకుపోయే వారు కొంతమందైతే, జబ్బలు పట్టుకుని చచ్చిన గేద్దూడను లాక్కెళ్తూంటే కట్టకుండా వదిలేసిన తల్లి గేదె వచ్చి ఓ పోటు పొడిచినట్టు మనమీదికెక్కేసే ప్రయత్నంలో పడేవారు కొంతమంది.  తాటి చెట్టెక్కి దాని మొగుల్లో కూర్చుని మనమీద తాటికాయలు విసిరేసిన చందంగా విసురు మరియు వాలు చూపులు దయతో మనమీద కురిపించేవారు మరికొంతమంది. మరికొంతమందేమో శ్రాద్ధం రోజున తవ్వెడు బియ్యపన్నం పడేస్తే వచ్చి వాలే బృందగాన కాకుల్లా "ఎందుకొచ్చిందో కూడా తెలీదా నీకు" అన్న కాకిగోల మొదలెడతారు. మరికొంతమంది పైత్యరసం తోడుగా తలతిప్పుడు వ్యాధి పూనిన పిశాచ సుందరులైపోతారు. మరికొంతమంది చిద్విలాసం అనే చిరుప్రపంచంలోకి మనల్ని తోసి ఎక్కడున్నామో, ఆ చిద్విలాస హాస దరహాస ముఖారవిందాన్ని చూస్తూ అసలు మనము వేసిన ప్రశ్నేమిటో మర్చిపోయేటంతటి ఆనంద హేతువుకు కారణభూతులౌతారు.

ఇహ ఇలా చెప్పుకుంటూ పోతూ ఉంటే బోల్డు రకాలు. మనకు రక్తాలు.

బ్లాగులు, తెలుగు బ్లాగరులు అందుకు అతీతం కాదని నిరూపితమయ్యింది కనుకన్నూ, కొన్ని బ్లాగుల్లో బిరుదుల అంకం మొదలవ్వటం మూలాన్నూ, భస్మాసుర హస్తం నెత్తిమీదెట్టుకుని చూస్తూ కూర్చోగా ఒక స్వప్నం కనపడింది కనుకన్నూ- బ్లాగ్క్షేత్ర యుద్ధం జరగబోతున్నట్టు...

ఒక వేళ మీ పుణ్యం కొద్దీ నా స్వప్నం నిజమైతే, ఆ యుద్ధమే జరిగితే - పై కాలపు చరిత్రే చెబుతుంది బ్లాగ్ బ్లౌరవులు గెలుస్తారో, బ్లాండవులు గెలుస్తారో....పురాతన చరిత్ర తిరగబడితే సంతోషం. చరిత్ర పునరావృతమైతే మరింత ముదావహం.

స్వస్తి వాక్యం పలుకుదాం అనుకూంటూండగా - డాక్టర్ ద్వానా.శాస్త్రి గారి మాటలు గుర్తుకొచ్చినాయి....ఆయన ఏదో వ్యాసంలో అంటారు - "దేవులపల్లిని శోకరస గంగాధర అనో బాష్పకవితా నయాగరా అని అధిక్షేపించడంలోనైనా సార్థకత వుంది. శివశంకర శాస్త్రి వల్ల భావ కవితా వ్యాప్తి జరిగింది కాబట్టి భావకవి సంజాయిషీదారు అనే బిరుదు ఇవ్వడమూ సమంజసంగానే వుంది. అంటే వేళాకోళంగా లభించిన బిరుదులే అర్థవంతంగా వున్నాయి. పిచ్చి పిచ్చి బిరుదులవల్ల, పెట్టుడు బిరుదుల వల్ల ప్రయోజనం లేకపోగా అభాసు కావాల్సిందే. చరిత్రలో చోటు దక్కదు. అతిశయోక్తులు, అత్యుక్తులు, వక్రోక్తుల జాబితాలోకి బిరుదులు చేరిపోతున్నాయి. బిరుదులన్నీ ఇంగువ కట్టిన గుడ్డలో, దుర్గంధం మూటకట్టిన గుడ్డలో కావడం విచారకరం. రచనలు, వ్యక్తిత్వాల ముందు బిరుదులు ఎందుకూ పనికిరావు. ఎక్కడో చదివాను ప్రతిభా జీవులకి బిరుదులు అక్కర్లేదు అని."   

ఫలశ్రుతి: ఈ బ్లాగ్లోకంలో కూడా బిరుదుల సంగ్రామం అప్రతిహతంగా పెరిగిపోయి బ్లౌరవులు - బ్లాండవులు వర్ధిల్లాలని కోరుకుంటూ...పేరోలగము వంటి బ్లాగ్ బ్లేరోగమున పూచీలేని పేచీలు లేవనెత్తినట్టు బిరుదఁ బ్రదానము సేయుట భావ్యమా అని తమని తాము ముందు ప్రశ్నించుకుని "అఖండ గోదావరీ జలకణ హల్లోహల మదబంభర మల్లధ్వనుల మల్లమలరు ఉద్దండ మండలేశ్వర చండ కాండాతికాండ నికురుంబకరంబిత బ్లాగ్రాజ సార్వభౌమా" అనే బిరుదు మాత్రమెవ్వరికినీ ప్రదానము సేయకుడు అన్న విన్నపముతోనూ... ...

మళ్ళీ పుర్రెలో పుణుకు నూనెలో తేలేదాకా శలవు....  

భవదీయుడు
వంశీ 

ముస్లిములు - ఫ్రాన్సు - మేకపోతు గాంభీర్యం ??

ముస్లిములు ఫ్రాన్సుని చాపకిందనీరులా ఆక్రమిస్తున్నారా?
ఫ్రెంచి గవర్నమెంటు తెత్తెన్నా మెమ్మెమ్మే నా?
విడుదల చేసే ప్రకటనల్లోది మేకపోతు గాంభీర్యమేనా?

చూడండి, వినండి -

http://downloads.cbn.com/cbnnewsplayer/cbnplayer.swf?aid=17933


ఈ వీడియోలో ఒకాయన అంటాడు....

We Expected Islam to Adapt to France Instead France Is Adapting to Islam

ఆలోచిస్తే... :) :)

అప్పుడెప్పుడో ముస్లిం సోదరులను కాపాడటానికి "అధ్యక్ష క్లింటను" వారు సెర్బుల మీద బాంబులేసారట. అరబ్బులను మందలు మందలు మందలుగా పదాతి దళాలలో చేర్చి యుద్ధ రంగానికి పంపించారట...


వివాదం లేపాలనుకునే వాళ్ళు వివాదాస్పదమైన కామెంట్లు తీసుకెళ్ళి మీ బ్లాగుల్లో పోసుకోండి....ఇక్కడ వ్రాయొద్దు.... ఏమిటి అర్థమయ్యిందా?

నచ్చనివి నిర్దాక్షిణ్యంగా తీసిపారెయ్యటమే! తర్వాత మొత్తుకున్నా ప్రయోజనం శూన్యం...

ఆ భాగ్యం కలిగించండి మహప్రభో !

మొత్తానికి 52 సంస్థానాల వివరాలు పూర్తయ్యాయి...ఎక్కడ?

ఇక్కడ....


ఈ లింకు నొక్కి వెబ్సైటుకు వెళ్ళాక ఎడమవైపున ఉన్న "సంస్థానములు" లింకు నొక్కి ఆనందోబ్రహ్మ

కొద్దిమంది రాజావార్లను చిత్రరూపంలో దొరకపుచ్చుకోవటం నా శక్తికిమించిన పనయ్యింది...

అవి తక్క మిగిలిన సంస్థానాల పేజీలు బోసిగా కనపడవచ్చు...

ఆయా రాజావార్ల చిత్రరాజాల దర్శన భాగ్యం ఎవరన్నా కలిగిస్తే అందుకు వారికి కృతజ్ఞుడిని....

ఒకావిడ కొన్ని చిత్రాలు ఇస్తానన్నారు కానీ ఆవిడ అలా ఏరులోకి వెళ్ళి తెప్ప ఎక్కి సముద్రతీరప్రాంతానికి వెళ్ళిపోయారు...ఆవిడ ఆ తెప్ప మీద తిరిగిరావటం ఎప్పుడో...రాజావార్ల చిత్రాల దర్శన భాగ్యం ఎప్పుడో

భవదీయుడు
వంశీ

మా ఆవిడ గొంతులో వడ్రంగి పిట్ట పొడిచింది

విజయ దశమి రోజున మా ఆవిడ - శ్రీదేవి - గొంతులో వడ్రంగి పిట్ట పొడిచింది. అవును "పొడిచింది".

ఇహ మీరు ఆ సంగతి ఇక్కడ వినాల్సిందే...

ఇంకొన్ని జంతువులు కూడా పొడిచేసినాయి కానీ, ముందు ఇది విన్నాక సంగతి చెబితే - మిగతా జంతువులేమిటో, ఆ పొడుపుడు విశేషాలేమిటో - అన్నీ మీ ముందుకు రావడానికి తయారుగా ఉన్నాయి........మీదే ఆలస్యం...

ష్ ష్....ఓ సంగతి....ఈ వడ్రంగి పిట్ట చేత నేనే పొడిపించా..కసి తీరా!

లేపోతే కర్నాటక సంగీతం నేర్చుకుని కూడా నాకు ఏ సాయంత్రంపూటైనా అలా ఓ సారి ఆహ్లాదంగా ఓ పాట పాడి వినిపించవమ్మా అంటే, మూతి ముప్ఫై వంకర్లు తిప్పుకుంటూ పోతుంది... అందుకు పెంచుకున్న కసి ఇలా తీర్చుకున్నానన్నమాట..

భవదీయుడు
వంశీ

ఏంటిదీ - మూడు కాళ్ళ తాబేలు బొట్టు పెట్టుకుందా?

నాన్న - ఏలియన్ ప్రిన్సెస్స్ కథ చెప్పాడు

వాళ్ళను గీసిపారేసి చూస్తూ కూర్చున్నా ! 

 

నాన్న - పెద్ద పిల్లి బొమ్మలు రెండు వెయ్యమన్నాడు 

వాటితో పాటు చిన్న మిక్కీ, చిన్న పిల్లి కూడా వేసేసా!

పిల్లి - ఎలుక ఫ్రెండ్స్ అంటే నాన్న వినడే!
ఒకే పేజీలో వేసేసా అందుకే!

 రాత్రి బూచాళ్ళ కథ చెప్పాడు నాన్న
వాళ్ళ పేర్లు లంబు, జంబు, నింబు అట!

ఇల్లు కట్టేసా!

మా కారు పార్కింగులో పెట్టేసా !

ఓ ! అమ్మకు కళ్ళజోడు ఉంటే ఇలాగుంటుందన్నమాట
ఇప్పుడు కళ్ళజోడు లేదు కానీ - నేను ఊహించేసా!

 

ఏంటిదీ? తాబేలుకు ఎక్కడన్నా మూడు కాళ్ళుంటాయా? 

పైగా బొట్టు పెట్టావేంటి అని అడిగాడు నాన్న!

ఇంకా నేర్చుకుని బోల్డు బొమ్మలు గీసిపారేద్దామనుకుంటే, మా ఊళ్ళో నాలుగున్నరేళ్ళ వాళ్ళని డ్రాయింగ్ క్లాసుల్లో తీసుకోరని చెప్పాడు నాన్న....ప్చ్చ్....బయట ఇంకెక్కడైనా టీచర్ ఉన్నారేమో చూస్తాను అని అన్నాడు...తొందరగా దొరికితే బాగుండు..


వైష్ణవి 

ఆకాశవాణి - 80వ దశకం - ప్రత్యేక భక్తి రంజని ఆడియో

దేవీ నవరాత్రులు మొదలయ్యాయి.....అమ్మవారు అందరినీ చల్లగా చూడాలని కోరుకుంటూ విషయంలోకి వచ్చేస్తే  

80వ దశకంలో ఆకాశవాణి వారు దేవీ నవరాత్రుల సందర్భంగా ప్రసారం చేసిన ప్రత్యేక భక్తి రంజని కార్యక్రమం ఇదిగో ....

ఎక్కడ? ఇక్కడ....

ఈ లింకు నొక్కి వెబ్సైటుకు వెళ్ళాక ఎడమవైపున ఉన్న "పరిచయాలు - నాటికలు" లింకు నొక్కి - ఆ సెక్షన్లో ఆ దేవీ నవరాత్రుల ప్రత్యేక భక్తి రంజని వినవచ్చు....

ఆడియోలు అందించిన రంజని గారికి (తెలుగుథీసిస్.కాం) హృదయపూర్వక కృతజ్ఞతలతో

భవదీయుడు
వంశీ

కాలయంత్రం (1982 ఆకాశవాణి నాటకం) - హెచ్.జి.వెల్స్ "టైం మెషీన్" స్ఫూర్తి

ఆంగ్ల రచయిత హెచ్.జి.వెల్స్ "టైం మెషీన్" స్ఫూర్తితో శ్రీ కె.చిరంజీవి గారు వ్రాసిన నాటకం ఇది. ఇరవైదేళ్ళ తర్వాత మనుషులు సమాజం ఎలా ఉండబోతున్నాయో ఊహిస్తూ వ్రాసిన నాటకం.

ఆకాశవాణి వారు 1982 లో తొలిసారిగా ప్రసారం చేసారు.
పునః ప్రసారం: అక్టోబరు 3, 2010

ఈ నాటకంలోని పాత్రలు ధరించింది వీరే:
సర్వశ్రీ
ఎన్.రవీంద్రారెడ్డి
డి.హనుమంతరావు
కె.హనుమంతరావు
పి.నారాయణ
డాక్టర్ పి.రామారావు
డాక్టర్ సి.నరసింహ
రత్నాసాగర్
శారదా శ్రీనివాసన్
కె. చిరంజీవి
వాణి రెడ్డి

సంగీతం: ఎం.చిత్తరంజన్, ఎన్.ఎల్.సుభాష్, మనోజ్ కుమార్

సాంకేతిక సహకారం: నజీర్ అహ్మద్, విశ్వనాథం, వి.ఎస్ వాసన్

(1961 - 1993) కాలంలో ఆకాశవాణి హైదరాబాదు నాటక విభాగ కళాకారుడిగా పనిచేసిన శ్రీ కె చిరంజీవి గారు రాసిన ఆ నాటకం ఇదిగో మీ కోసం.

శ్రీ రంజని గారి (తెలుగుథీసిస్.కాం) సౌజన్యంతో.
ఈ ఆడియోను అందించిన ఆయనకు హృదయపూర్వక కృతజ్ఞతలు

ఈ లింకు నొక్కి వెబ్సైటుకు వెళ్ళాక ఎడమవైపున ఉన్న "పరిచయాలు - నాటికలు" లింకు నొక్కి - ఆ సెక్షన్లో ఆ నాటకం చూడవచ్చు, వినవచ్చు....

భవదీయుడు
వంశీ