రాక్షస స్త్రీ నామాలు

సీతమ్మ వారికి అశోకవనంలో కాపలా ఉన్న రాక్షస స్త్రీ నామాలు మచ్చుకి కొన్ని...ఇంకా చాలా మంది ఉన్నారు కానీ, ఈ తొమ్మిది మంది సీతమ్మవారికి అంగరక్షిణుల మాదిరి విడువకుండా కాపలా కాయటానికి రావణుడు నియోగించిన స్త్రీలు

త్రిజట
త్ర్యక్షి
లలాటాక్షి
ఏకాక్షి
దీర్ఘజిహ్వ
త్రిస్తని
అజిహ్వ
ఏకపాది
ఏకలోచని

ఈ రాక్షస స్త్రీలలో కొంచెం ఉత్తమమయినది త్రిజట. ఈవిడ సీతమ్మవారిని ఓదారుస్తూ ఉండేది.(కాపలాగా ఉన్నా కూడా!!)


మిగిలిన రాక్షస స్త్రీల గురించి తరువాతి టపాలో

తిట్లు - తీరు

తిట్లు - తీరు

ఆవేశపూరితమయిన మనిషి కోపానికి రూపం తిట్టు. ఆవేశం ఎక్కువయ్యేకొద్దీ వేడెక్కే బూతులు కూడ తోడవుతూ ఉంటాయి. సరే బూతులు మనకెందుకు కానీండి కానీ, అసలు తిట్లు ఎలా తిడతారో చూద్దాం

ఊతపదాలయిన తిట్లు కొన్ని

పళ్ళు రాలగొడతాను పిచ్చి పిచ్చిగా వాగావంటే
ముక్కలు ముక్కలుగా కోసి కాకులకీ గద్దలకీ వేస్తా
పీక పిసికి పారేస్తా
గోతిలో కప్పెట్టేస్తా దొంగ వెధవా
వీపు విమానం మోతే
చంపి పారేస్తా ఏమనుకుంటున్నావో
తల్లి తోడు నీ ప్రాణం తీయకపోతే
చెంప పగిలిపోతుంది
నీ మొఖం మండనీ నోరు పడిపోను
నీ నోట్లో పురుగులు పడ
నీ శవం కాటికెళ్ళ
నీ జిమ్మడ
నీ పెళ్ళాం ముండ మొయ్య
నీ పెళ్ళాం రేవులోకెళ్ళ
నీ తెలివి సంతకెళ్ళ
నిన్ను అమ్మోరు యేసుకుపోను
నీ తాడు తెగ
నీ కాళ్ళూ చేతులు పడిపోనూ
నువ్వు దిక్కులేని చావు చస్తావు
నిన్ను గోతిలో పెట్ట
నీ అమ్మ కడుపు కాలా
వెధవసచ్చినోడా
బుర్ర రామకీర్తన పాడించేస్తాను వెధవ
నిన్ను కోదండం తీయించకపోతే నా పేరు కాదు
ఒక్క తన్ను తన్నానంటే ఆమడ దూరం పడతావు
దిక్కున్న చోట చెప్పుకోరా ఫో
అడ్డంగా నరికి పారేస్తా
నోరు ముయ్యి
ముక్కలు ముక్కలుగా నరికేస్తా
గూబ గుయ్యిమంటుంది వెధవ వాగుడు వాగావంటే
కళ్ళు పీకేస్తాను
గుడ్లు పెరికేస్తాను
మేకగుడ్ల వెధవ
సోంబేరి నాయాల
సాచి లెంపకాయ కొడితే మంచినీళ్ళు కూడా అడగవు
దవడ పగిలిపోతుంది
పెంట వెధవ
ఊరపంది
నరుకుతా - దిక్కున్న చోట చెప్పుకో పోరా
నీ దెవసం పెట్ట
నీ తద్దినం పెట్ట
నిన్ను తగలెయ్య
ఏం పోయే కాలం వచ్చిందిరా దరిద్రుడా

ఇలా కొన్ని వందలు ఉన్నాయి

సరే మరి కొన్ని వచ్చే భాగంలో...

సశేషం

సణుగుడు మేళమా ?

మొన్నామధ్య బ్లాగ్మిత్రుల కథలు చూసి ఆవేశపడిపోతూ నాకు కూడ ఒక కథ రాయలనిపించి, బుర్రున బరికితే ఈ రూపం సంతరించుకుంది.

ఈ కథ మన తెలుగు గుంపులోని వారు చదివి, ఈ కథలోని పిండి పిసికి ఆరేసారు. అయినా సరే సొంత గూడు తెరిచాక మళ్ళీ ఇక్కడ కూడా పడేస్తే పోతుందేమో అని ఒక దు(దూ)రాలోచన వచ్చి ఇక్కడ అతికించా...

ఇదిగో మీరు రాసే కథలన్నీ చూసి, మా ఊర్లో ఉండే ఒకానొక వ్యక్తి కథ రాయాలి అనిపించింది...మహా మాటకారి, మాట కరుకయినా మంచి మనసున్న వ్యక్తి...కొన్ని కారణాల వల్ల పేర్లు మార్చి రాయవలసి వచ్చింది...ఆయన జీవితంలో ఒక రోజులోని అర్ధ భాగం ఎలా జరిగేదో ఈ మొదటి భాగంలో..ఈ భాగంలో ఇక్కడ మీకు ఆయన మంచి మనసు కనపడకపోవచ్చు...మిగతాది తరువాయి భాగంలో ...

సణుగుడు మేళమా ?

ఏమేవ్ పార్వతీ! ఎక్కడ ఉన్నావ్! ఇది కొంపా, శనివారం సంతా. ఒక్కటి కూడా కనపడి చావదేమే, ఎక్కడ పెట్టింది అక్కడ ఉంచకుండా ఈ తాడేపూడి తద్దినాలు ఏంటి నాకు..ఇంకోసారి నా వస్తువులు ముట్టుకున్నారో చమడాలు వలిచి పారేస్తాను. దరిద్రమానీ - దరిద్రం.

ఒరే బుజ్జిగా - నిన్ను తగలెయ్య. స్కూలుకు తయారు అవరా అంటే ఆ వెధవ దిక్కుమాలిన టీ.వీ చూస్తూ కూర్చున్నావ్..అసలు హోం వర్క్ చేసి చచ్చావా? ఆ పంతులు గారికి నేనే వచ్చి చెపుతా "వీపు మీద విరివిగా బెత్తంతో బాది పారెయ్యమని". అప్పుడు గానీ బుద్ధి కుదురుకోదు వెధవన్నర వెధవా..ఎన్ని సారులు చెప్పాలిరా నీకు -ఆ వెధవన్నర వెధవ, ఆ సత్రకాయ సుబ్బారావు గాడి కొడుకుని చూసి బుద్ధి నేర్చుకోమని, వాడి లాగా చక్కగా చదువుకుని ఫస్టు రాంకు తెచ్చుకుందామని ఎప్పుడు ఉంటుంది రా నీకు.ఎన్ని సార్లు చెప్పు - ఆ దేభ్యం మొహం వేసుకుని చూడటం తప్పితే ఒక ఉలుకు పలుకూ ఉందా.అసలు నాదీ బుద్ధి తక్కువ, నీతో మాట్లడటం.


ఒసేవ్ - ఎక్కడ తగలడ్డావు? అరగంట అయ్యింది లేచి - కొంచెం కాఫీలు, ఫలహారం నా మొహాన తగలేద్దాము అని ఏమన్నా ఉన్నదా ...అసలు ఏం చేస్తుంటావే ఆ వంట గదిలో అంతంత సేపు. చేసే ఆ దిక్కుమాలిన వంటకి ఆ వడలిపోయిన కూరగాయలతొ, వన్నె తగ్గిన వంట పాత్రలతో మూడు గంటలు ముచ్చట్లు. పైనుంచి తెగ అలసిపోయినట్టు హస్షో హుస్షో అనుకుంటూ బయటికి రావటం. ఖర్మే ఖర్మ.


అహా....అసలు అయినా నాకు మంచి వంట తినే ప్రాప్తం ఉండొద్దూ. ఈ పదార్ధాన్ని ఏమంటారు పార్వతిగారూ.. ఏమిటీ? ఉప్మానా, అబ్బో దస్తావేజులు బొత్తులు బొత్తులుగా ఈ జిగురు పదార్ధంతో అతికించుకోవచ్చు.. అసలు అయినా మీ అమ్మను అనాలి, నా ముద్దుల ఒక్కగానొక్క కూతురు ఎక్కడ అలిసిపోతుందో అని వంట, పెంట నేర్పించకుండా, పెళ్ళి చూపులకి వెళ్ళినప్పుడు - అహా మా అమ్మాయి వంట ముందు నల భీములు పనికి రారు అని డబ్బా కొట్టి ఊదర గొట్టారు. పైగా ఫలహారాలు అయ్యాక ఈ సున్నుండలు మా అమ్మాయి చేసినవే అని ఆ రామావతారం గాడి కొట్లోనుంచి తెచ్చిన సరుకు నా నోట్లో కుక్కి, నాకు నిన్ను తగలేశారు. సరేలే యే జన్మలో యే పాపం చెసుకున్నానో, మంచి వంట తినె ప్రాప్తం లేదు...


"ఒరే పరంధామం - ఎందుకురా అస్తమానూ ఎప్పుడూ అలా ఏదో ఒకటి సణుగుతూ ఉంటావు? నువ్వు ప్రశాంతంగా బతకవు, పక్కల మనుషుల్ని ప్రశాంతంగా బతకనివ్వవు. ఎందుకురా ఇలా తయారు అవుతున్నావు. వయసు వచ్చే కొద్దీ పెడసరం మాటలు ఎక్కువ అవుతున్నాయి నీకు. తగ్గించుకోరా..."


ఊరుకో నాన్నా..నువ్వు బయటపడట్లేదు, నేను బయటపడుతున్నా అంతే తేడా....సరేలే నేను సాయంత్రం వచ్చేటప్పుడు నీకు ఆ దగ్గు మందు తెస్తా. అందాకా ఆ పాలల్లో, మిరియాల పొడి వేస్కుని ఆర ఆరగ తాగుతూ ఉండు. సరే మరి నే వెళ్ళొస్తా.


అవునుగానీ లక్ష్మీ - ఆ శ్యామలరావు వాళ్ళ అబ్బాయి అవేవో సంగీతం పాఠాలు చెప్పడం మొదలెట్టాడుట. ఆ వివరాలు కనుక్కుని చెప్పు నాకు.సాయంత్రం వెళ్ళి శ్యామలరావుతొ మాట్లాడి వస్తా. చేరుదువు కానీ - ఈసారన్నా నాయనమ్మ కోరిక ప్రకారం ఆ సంగీత శిరోమణి పరీక్ష ప్యాసు అయ్యి ఆవిడ మనస్సుకి కొంచెం శాంతి కలిగించవే...


పార్వతీ - తలుపు గడెట్టుకో. అసలే దొంగల భయం ఎక్కువగా ఉంది ఈ మధ్య. ఆ గ్యాసు బండ వాడు వస్తే వాడిని ఆ వసారాలో తగలేసి పొమ్మను. లోపలికి రానివ్వబోకు. ఆ బండ నీ నెత్తి మీద వేసి ఆ వారా నగలు ఎత్తుకుపోగల...జాగ్రత్త....


ఈ వెధవ రామ్మూర్తి పీనుగ ఏమంటాడో ఏమిటో , అరగంట లేటుగా వెళ్తున్నాను ఆఫీసుకి. ఏదో ఒక దిక్కుమాలిన కారణం వెతుక్కుని చావాలి ఇప్పుడు.ఈ ఆఫీసులోకి వీడు మానేజరుగా వచ్చినప్పటినుంచి సంత క్షవరం లాగా అందరి తలలు నున్నగా చెక్కి పారేస్తున్నాడు,అక్షింతల కత్తెరతో వెధవ పీనుగ. సుఖంగా ఒక కాఫీ తాగనివ్వడు, ఒక హస్కు వేసుకోనివ్వడు అదేం రోగమో వీడికి.


సరే ఇవ్వాళ్ళన్నా ఆఫిసుకు వెళ్ళాక ఆ సుబ్బారావు గాడిని డబ్బులు అడగాలి. బట్టబుర్ర వెధవ, ఎప్పుడు చూడు ఈసురో మంటూ ఉంటాడు. తీసుకున్న డబ్బులు ఇవ్వరా అంటే ఆ బుర్ర గోక్కుంటూ, ముక్కులో వేళ్ళు తిప్పుకుంటూ, ఆ పార పళ్ళు బయటపెట్టి "ఇదిగో రేపు ఇచ్చేస్తా అన్నయ్యా, ఈ సారి తప్పకుండా నా మాట నమ్ము" అని ఒక వెర్రి నవ్వు నవ్వుతాడు. ఇవ్వాళ్ళ ఊరుకోకూడదు. సంగతి అటో ఇటో తేల్చి పడెయ్యాలి.

టికెట్...టికెట్...

ఇదిగో బాబూ కోనేరు సెంటరు కి ఒకటి కొట్టు...


ఇదిగో బాబూ కొంచెం తప్పుకుంటావా, నేను దిగాలి....ఓయ్ ఓయ్...ఆగవయ్యా ఇక్కడ జనాలు దిగాలేదు పెట్టాలేదు, బుర్రున తోలిపారెయ్యడమేనా. ఎవడన్నా ఆ చక్రాల కింద పడితే ఏమవును. బుద్ధుందా అసలు నీకు, ఎవడిచ్చాడయ్యా అసలు నీకు లైసెన్సు...


దిగండి మాష్టారు , అనవసరమయిన మాటలు ఎందుకు...రైట్...రైట్


హూన్ ....సరే ఇప్పుడు ఈ మూడు అంతస్థుల మెట్లు ఎక్కాలా ఇప్పుడు. ఈ బస్సుల్లో ప్రయాణం ఏమిటో, ఈ ఆఫీసు గొడవలేమిటో. దిక్కుమాలిన జీవితమాని దిక్కుమాలిన జీవితం.


ఏరా పరంధామం ఏమిటి సంగతి? ఇవ్వాళ్ళ ఆలశ్యంగా వచ్చినట్టున్నావు ఆఫీసుకి...అంతా కుశలమేనా ....

ఆం...కుశలం కాకపోతే, నారాయణ నారాయణ అంటూ నీ పేరు జపిస్తూ మంచంలో తీసుకుంటూ పడి ఉండమన్నావా ఏమిటి? వెధవ ప్రశ్నాని వెధవ ప్రశ్న.. ఆం...అయినా బాధలు ఉంటే మటుకు ఎవడు తీర్చొచ్చాడులే...సరే కానీ ఆ రామ్మూర్తి వచ్చాడా ? చూసావా ?


నిన్ను ఏదన్నా అడగటం తప్పురా పరంధామం, ఉరుము ఉరుమి మంగలం మీద పడ్డట్టు, నా మీద పడతావు ఏమిరా.....ఏదో చిన్ననాటి స్నేహితుడివి కదా అని ఊరుకుంటున్నా...సరే ఇక నుంచి నీ బాధలు చెప్పొద్దు, నీ సుఖాలు నాకు చెప్పొద్దు. ఆ రామ్మూర్తి గాడు ఇవ్వాళ్ళ మధ్యాహ్నం నుంచి వస్తాడుట, ఇందాకే కబురు పెట్టాడు.


హమ్మయ్య...ఒక పీడ విరగడ అయ్యింది - సగం రోజన్నా సంతోషంగా ఉండొచ్చు... సరే కానీ..ఒక విషయం చెప్పు నాకు
సశేషం...

శెలవురోజుల్లో చేసిన పని ఏమిటయ్యా అంటే...

ఈ శెలవురోజుల్లో చేసిన పని ఏమిటయ్యా అంటే - ఎప్పటినుంచో అనుకుంటూ, బద్ధకంతో పక్కన పడేస్తూ వచ్చిన ఈ బ్లాగు తయారీ, మొత్తానికి మొదలుపెట్టాను.

అదండీ సంగతి.

ఇక రాతలు రాయటం మిగిలింది.